A awmpui nghaisa ṭhintu Jharkhand-a BJP hruaitu man

Jharkhand-a BJP hruaitu, Seema Patra-i chu nimin zing khan police-ten an man. Man a nih hma hian BJP chuan party aṭangin a lo suspend tawh bawk.

BJP women wing-a national working committee member, Seema Patra-i hian an awmpui, tribal, kum 29 mi Sunita chu a nghaisa ṭhin a, a ha pawh iron rod hmangin a vuak bal sak a, ei tur pe loin hun rei tak a hren bakah, zun te a liah tir ṭhin nia sawi a ni. An awmpuinu laka a chetdan hi a fapain a ṭhianpa bula hrilhin pui turin a ngen a, a ṭhianpa hian police-te a pun a, an awmpuinu hi chhanchhuah a ni ta a ni. Sunita hi kum 10 an awmpui hman a ni.

Sunita hi kar liam ta khan chhanchhuah niin Rajendra Institute of Medical Sciences (RIMS)-ah enkawl mek a ni, a taksa leh hmaiahte hliam tuarin, a ṭhu ṭha thei lo bawk. A video pawh hi social media lamah a darh nasa hle.

Patra-i hian a fapain Sunita puih a tum tih a hriat hnuah Ranchi Institute of Neuro-Psychiatry and Allied Sciences-ah a admit a, a fapa hi a dam ṭha lo niin a sawi. An awmpuinu laka a chetdan an sawi chu thu dik lo nia sawiin, tihsual engmah a neih loh thu a sawi.