Arvind Kejriwal-a'n virtual school a hawng

Delhi chief minister Arvind Kejriwal chuan nimin khan virtual school a hawng a, hetah hian ram chhung hmun hrang hranga zirlaiten admission an ti thei dawn a ni.

Delhi Model Virtual School (DMVS) hi class 9-12 tan buatsaih niin, nimin aṭang khan admission pawh tih ṭan theih nghal a ni bawk.

Kejriwal chuan, "Virtual school-a admission hi ram chhung hmun hrang hranga zirlaite tan hawn vek a ni a, zirlaite hi entrance exam hrang hrang - NEET, CUET leh JEE atan expert-ten an zirtir dawn a, hei bakah hian skill-based training te pek an ni bawk ang," a ti. Virtual school hmasa ber an siam chu India ram tan education sector-a mellung pawimawh tak a nih thu a sawi.

"Zirlai tam tak, school awmna hlat vang leh harsatna dang vanga school kal thei lo an awm. Nu leh pa ṭhenkhat chuan an fanute kalchhuah tir an duh loh avangin lehkha an zirtir loh phah bawk a ni. Hei vang hian heng miten zirna an dawn vek theihna turin virtual school hi kan din a ni,"tiin Kejriwal chuan a sawi. Class hi online veka neih niin, lecture-te chu record vekin, online-ah upload ṭhin a ni ang.