Gujarat-ah AAP hruaituin beih a tawk ; AAP-in BJP worker-te tih niin an puh

Gujarat-a Aam Aadmi Party (AAP) hruaitu, Manoj Sorthiya chu Thawhlehni khan Surat-a Simanda Naka-a an party office bulah beih a ni a, hliam a tuar a, damdawi-inah dah a ni. AAP chuan an party hruaitu kuthlaktute hi BJP worker-te niin an puh.

State party general secretary Sorathiya hian Ganesh Chaturhi lawmna tura inbuatsaih dante a enfiah laiin BJP mi leh sate hian an bei niin a sawi. AAP chuan Gujarat-a an party-in hma a sawn chho leh, an lar chho zel chuan BJP hi a tihlauthawng niin an sawi a ni.

AAP hian assembly inthlan hmabak, Gujarat-ah hian September 2, Ganesh Chaturthi niah door-to-door campaign ṭan a tum a, party hotu lu ber Arvind Kejriwal pawh zin a tum a ni.