Vice President atan Venkaiah Naidu tling

India Vice President thar atan rorellai, NDA candidate Muppavarapu Venkaiah Naidu chu hneh taka thlan tlin a ni.

Vice President thar thlanna hi kar kalta Inrinni khan neih a ni a, Parliament in hniha member-te’n an thlang a ni. Vice President thlannaah hian NDA candidate M Venkaiah Naidu leh eptu pawl candidate inṭawm Gopalkrishna Gandhi-te an inkhing a ni.

Inrinni-a vote thlaknaah Naidu hian vote 516 hmuin eptu candidate Gandhi chuan vote 244 a hmu. Candidate-te vote inthlauhna hi 272 a tling a ni. Vote thlak thei, electoral college-ah hian member 785 an awm a, an zinga member 771-te chuan vote an thlak a, vote 11 chu a thi niin official-te’n an sawi. Hetihlai hian Member 14-te chuan vote an thlak lo.

Vote tlate hi Inrinni zan khan chhiarin, zan dar 7-ah inthlan result hi puan nghal a ni.

Vice President 15-na tur, Venkaiah Naidu hi kum 68 mi niin, August 11 hian President Ram Nath Kovind chuan rinawmna thu tiam tirin a lalut ang. Vice President thar lakluh inkhawm hi Rashtrapati Bhavan-ah neih a ni ang.

Muppavarapu Venkaiah Naidu:
Vice President atana thlan, Muppavarapu Venkaiah Naidu hi kum 1949, July 1 khan a piang a, Prime Minister Narendra Modi-a kaihhruai sorkarah Minister of Housing and Urban Poverty Alleviation, Urban Development and Information and Broadcasting hna a lo chelh tawh a ni.

BJP hruaitu hlun niin, kum 2002-2004 chhung khan BJP national president pawh a lo ni tawh a ni. Hemi hma hian Atal Bihari Vaj­payee-a kaihhruai sorkarah khan Union Cabinet Minister for Rural Development a lo ni tawh bawk.

Naidu hi Andhra Pradesh-a Nellore district-a Chavatapalem khuaa piang a ni a, Nellore-a VR College aṭangin bachelor degree a zo a, hemi hnu hian Andhra University College of Law, Visakhapatnam-ah law degeree a zo leh a ni. College a kal lai hian Rashtriya Swayamsevak Sangh-ah swayamsevek niin, a hnuah ABVP a zawm leh a, zirlai hruaitu atan thlan a ni. Kum 1978 leh 1983 khan Andhra Pradesh-a Udayagiri constituency aṭangin MLA atan thlan a ni a, Andhra Pradesh BJP hruaitu langsar tak a ni chho zui a ni.

Kum 1998-ah Karnataka aṭangin Rajya Sabha member atan thlan a ni a, 2002 leh 2010 khan thlan zui leh a ni.

1999 inthlanpuia NDA an chak khan Prime Minister Atal Behari Vajyapee kaihhruai sorkar­ah Rural Development minister atan dah a ni a, he ministry a enkawl chhung hian thingtlang lam tihhmasawnna turin a bei nasa hle a, scheme hrang hrang pawh duangin heng zingah hian Pradhan Mantri Gram Sadak Yojana (PMGSY) pawh a tel. Kum 2014 inthlanpuia BJP-in hnehna an chan leh hnu khan, PM Modi-a hnuaiah Urban Development and Parliamentary Affairs minister atan lakluh a ni a, vice president thlan dawna NDA-in candidate atana an ruat hnu khan minister a nihna aṭang hian a bang ta a ni.