Delhi Assembly-ah AAP sorkarin fiahna paltlang

Delhi chief minister Arvind Kejriwal-a'n Delhi Assembly-a a kaihhruai Aam Aadmi Party (AAP) rintawkna motion a putluh chu nimin khan vote lak a ni a, dodaltu awm loin pass a ni.

Arvind Kejriwal hian Delhi-a AAP sorkar paihthlak tum a, BJP-in AAP MLA 40-te sum hmanga lei tuma an thlem nia an puh hnuah, an party MLA tumah uire tum an awm lo tih sawiin, an rinawm a ni tih fiahna turin Assembly-ah hian confidence motion a pu lut a ni.

Delhi Assembly-ah hian seat 70 awmin, AAP hian MLA 62 leh BJP-in MLA pariat an nei.

Nimina sorkar rintawkna motion chungchanga vote laknaah hian, ram danga zin mek AAP MLA pahnih leh jail-a tang mek, AAP minister Satyender Jain tih loh, MLA dang 59 chuan Kejirwal kaihhruai sorkar chu an thlawp a ni.

Fiahna an paltlang hnuah, Kejriwal chuan BJP-in party dang sorkarna tihchhiat tuma beihpui a thlakna, Operation Lotus chu Delhi-ah chuan a hlawhchham chiang hle a ni, a ti.

Kejriwal chuan BJP-in AAP leh party hruaitute a beih dan chungchangte sawilangin, CBI hmanga a deputy chief minister Manish Sisodia chunga hma a lak dante a sawichhuak bawk. CBI hian Delhi Excise Policy kalpui danah thil fel tawk lo awm nia sawiin, he thila inhnamhnawiha puh Manish Sisodia chenna in bakah, a bank locker thlengin a lo dap sak tawh a ni. Mahse central agency-te hian an thil dapnaah thil engmah dik lo hmuh an nei lo tih an sawi. "Manish Sisodia in leh a thil neihte dapsak a nih hnuah, Gujarat-a AAP vote share chu 4% in a pung chho tawh a, man ni ngat phei se chu 6% in a pung ang, " tiin kumin kumtawp lama assembly inthlan neihna tur, prime minister Narendra Modi home state, Gujarat-a an party inbuatsaih dan a sawinaah a sawilang bawk.

Delhi Lt Governor-in AAP hruaitute khinah a vau
AAP leh BJP inepna kal zelah, Delhi Lieutenant Governor VK Saxena leh AAP inkar boruak pawh a ṭha lo chho zel.

Delhi Lt Governor Saxena chuan eirua puh a nih chungchang chu thu dik lo leh, amah tihhmingchhiat tumna nia puhin, AAP hruaitute chu khinah a vau.

AAP hian kum 2016-a sorkar hnuaia Khadi body chairman a nih laiin, Saxena hian a hnuaia thawk mi pahnih chu pawisa tih thih tawh, Rs vbc 1,400 hu chu thleng turin a nawr lui niin an sawi a ni. Mahse Saxena chuan an puhna hi thu dik lo, an suangtuahna mai mai a ni, a ti.

Saxena chuan pawisa note thi tawh, Khadi Gramodyog Bhawan account-a deposit a nih chungchangah hian vigilance inquiry pawh neih niin, he thila inhmahnawih official pali suspend an ni tih a sawi. CBI-in an chhui hnuah, pawisa note thi tawh hi Rs 17,07,000 deposit a lo ni a, official zingah pawh pahnih chauh an inrawlh tih a sawi bawk. Case hi court-ah a tang mek niin a sawi.

Hetih lai hian AAP lam chuan he thil thleng chhui dan hi a dik tawk lo nia sawiin, independent inquiry neih leh an phut thung.