August thlaa GST aṭanga sum hmuh 28% in a pung

Sorkar laipuiin data a tihchhuah tharah, kumin August thla chhunga Goods and Services Tax (GST) aṭanga sum hmuh chu kum hmasa aiin 28% in a tam.

Data tihchhuaha tarlan a nih danin, August thlaa GST aṭanga sum hmuh chu Rs vbc 1,43,612 a tling a, heng zinga Rs vbc 24,710 chu CGST niin, SGST aṭangin Rs vbc 30,951, IGST aṭangin Rs vbc 77,782 bakah cess Rs vbc 10,168 a ni bawk. Kum 2021 August thlaa GST aṭanga sum hmuh kha Rs vbc 1,12,020 a ni.

August thla chhunga ram pawn aṭanga bungraw lakluh aṭanga GST sum hmuh hi 57% in a pung a, ram chhunga bungraw thawnkual, domestic transaction aṭangin a sum hmuh hi nikum lam aiin 19% in a tam bawk.

Indian economy chu April-June quarter chhungin 13.5% in a ṭhang a, mahse economist expert-te chuan interest rate sang zel leh, ram chhunga economic activity tlahniam avangin quarter dawt lehah chuan economic growth hi a tlakhniam an ring thung.