Gangster Dawood Ibrahim chinchang hrilh thei hnenah NIA-in lawmman Rs nuai 25 pek a tiam

National Investigation Agency (NIA) chuan kum 1993-a Mumbai-a ṭum eng emaw zat bomb tipuahnaa mawhphurtu bera puh, gangster Dawood Ibrahim chinchang hrilh thei hnenah, lawmman Rs nuai 25 a pe dawn tih nimin khan a puang.

NIA hian Ibrahim thawhpui hnai tak, Shakeel Shaik alias Chhota Shakeel awmna chin hrilh thei hnenah Rs nuai 20 leh, a thurualpui dang Haji Anees alias Anees Ibrahim Shaikh, Javed Patel alias Javed chikna leh Ibrahim Mustaq Abdul Razzak Memon alias Tiger Memon-te awmna chin hrilh thei hnenah Rs nuai 15 pek a tiam bawk. An vai hian Mumbai-a bomb tipuahnaa inhnamhnawiha puh vek an ni.

United Nations chuan Dawood Ibrahim hi firfiakah a lo puang tawh a ni. Ibrahim hian terrorist network, D-Company tih chu a thawhpuite ho nen hian an siam niin NIA chuan a sawi. Mumbai khawpuia bomb tihpuahna bakah, pawikhawihna dang hrang hrangah, ralthuam tawlhruk thlengin an inhnamhnawih nia puh an ni bawk.