School-a compulsary-a Yoga dah dilna hnawl

Supreme Court chuan India ram chhunga school hrang hranga Yoga zir tel ngei ngei tura dah dilna chu nimin khan a hnawlsak.

Court chuan school-a zirna kalpui dan tur chungchang chu a thutlukna siam tur a ni lo a, sorkar-in mi thiamte rawnin thutlukna a siam zawk tur a ni, a ti.

Justice Madan B Lokur-a kaihhruai bench chuan fundamental right to eduation a awm a, mahse right hnuaiah hian Yoga hi zir ngei ngei tura tihna a awm lo niin a sawi a, hei vang hian zirlaite hnenah eng nge zirtir tur tih chungchang chu court lamin a lo siam tur a ni lo tih a sawi.

Petition hi lawyer JC Seth leh Padma awardee GL Tandon-te thehluh a ni a, school syllabus leh textbook-ah Class I - VIII inkar tan yoga zirna hi telh vek turin an ngen a ni. Delhi High Court-in an dilna hi a hnawlsak hnuah Supreme Court-ah an thlen leh a, mahse Supreme Court pawhin a lo hnawlsak ve leh a ni.