Mumbai court-in Somali lawng suamhmang 16 hrem

Mumbai court chuan Somali lawng suamhmang mi 16-te chu kum 2011-a Iran aṭanga kal sangha manna lawnglian an rukbo avang leh, lawnga thawk Iran leh Pakistan mite an hren avangin thiam loh a chantir a, kum sarih ṭheuh tang turin a hrem.

Special public prosecutor Ranjeet Sangle chuan Sessions judge JC Jagdale chuan Unlawful Activities Prevention Act hnuaiah thiam loh a chantir tih a sawi. Court chuan kum sarih tang tura a hrem bakah, Rs 14,000 ṭheuh chawi turin a ti bawk. An tan hun an tlan hnuah Somalia rama thawn haw turin sorkar a hriattir nghal bawk.

Somali lawng suamhmangte hian kum 2011 khan Iran aṭanga kal, sangha manna lawnglian MV Morteza lawng chu Syecheles bulah an hijack a, Somalia ram an panpui a, he lawng hi lawng dangte suamna atan an siam zui a ni. Kum 2011 March 26 khan MV Morteza hmang hian sumdawng lawng lian, Maersk Kensington chu an bei a, hei hi hriattir an nih hnuah Indian navy lawng Suvarna chu tirh a ni a, suamhmang lawng chu an khawl ti thi turin an hrilh a, mahse suamhmangte hian a lo kap let ta zawk a ni.

Navy-te hian MV Morteza hi kapin a kang zui a, he lawnga thawktu suamhmangten an hren, Iran mi 12 leh Pakistan mi 4 te chu an chhanchhuak a, Somali lawng suamhmang 16-te chu an man zui bawk.

Indian Navy leh Indian Coast Guard-te hian kum 2011 January leh March inkar khan lawng suamhmang 120 zet an man a, an vai hian Mumbai-a Yellow Gate police kutah an hlan a ni.