Dawt sawitu police nupa ban an ni
Pune-a police constable nupa Dinesh leh Tarkeshwari Rathod-te chuan nikum May thla khan khawvela tlang sang ber, Mount Everest an lawnchhuak nia dawt an sawi avangin an hna aṭangin ban an ni.
Shivajinagar police headquarters-a thawk, Dinesh leh Tarkeshwari-te nupa hian nikum June 5 khan India mi zinga nupa-a Everest tlang lawn chhuak hmasa ber niin an insawi a, an thlalakte pawh an tarlang a ni. Mahse tualchhunga tlang lawn mite chuan he mite nupa hi Everest tlangah an lawn lo a, Everest tlang chhipa an thlalak nia an sawi te pawh siam danglam chawp a nih thu an sawi. Nikum August thla khan Nepal sorkar pawhin Dinesh-te nupa hi an rama kum 10 chhung an kal a khapsak bawk.
Everest tlang lawnchhuak nia an insawi chungchangah hian complaint a luh avangin chhui chiang turin thupek tihchhuah a ni a, nikum November thla khan suspend an ni nghal bawk. Pune police-te chuan Nepal sorkar hnenah pawh chhui tur hian ngenna a thawn a ni.