Pawisa note chi hnih awm vangin eptute lungawi lo

Eptu party, Congress bakah Trinamool Congress leh Janata Dal (United) member-te chuan nimina Rajya Sabha inkhawmah pawisa note lian pahnih, Rs 500 leh Rs 1000 note chi hnih ve ve tihchhuah a nih avangin sorkar chu na takin an bei.

Congress member-te chu House laiah an chhuah khawm a, pawisa note chi hnih siam chu inbumna tenawm tak nia an ngaih thu sawiin an au bengchheng a, House Leader Arun Jaitley-a’n khap a tum pawhin an eptu lam hian an zawm duh lo. Congress party hi JD-U member, Sharad Yadav chuan lo thlawpin pawisa note pawh alo tilang a ni.

TMC member ṭhenkhat pawhin nikum November thlaa pawisa note lian pahnih tih thih a nih hnua Rs 500 note thar tichhuah, a size in ang loa tihchhuahte chu an lo pholang tel bawk a, pawisa note inang loa tihchhuah a nih chhante sawifiah turin an phut.

TMC MP Derek O’Brien chuan Rs 500 note thar tihchhuah hi chi hnih awmin, a lenzawng leh design pawh a inang lo niin a sawi a, hetiang hi khawi ram dangah mah a awm ve lo a, hei hi ngaihzam mai chi a ni lo, a ti.

Pawisa note inang lo tihchhuah chungchanga eptu lungawi loten rorel thei loa bengchheng an siam avang hian nimina Rajya Sabha inkhawm hi ṭum li lai tihtawp a ngaih phah a ni.