NKorea-in nuclear programme tihtawp tum lo
North Korea chuan ram dangten a nuclear programme titawp turin nawr reng mah se tihtawp a tum lo tih a sawi.
United Nations chuan NKorea-in UN resolution palzuta ballistic missile a enchhin chhunzawm zel avangin hrekna na zawk a siam a, hei hi NKorea chuan na takin a sawisel a ni. NKora chuan an ram venhimna turin a tul angin nuclear ralthuam a hman tur thu a sawi.
UN-a US ambassador Nikki Haley chuan NKorea chu mawhphurhna hre lo leh awm ngaihna hre loah a puh a, US leh ramdangten a vauna chu an hlau lo tih a sawi.
UN-in hrekna thar a siam hi NKorea ram ṭhian ṭha, China leh Russia pawhin an thlawp a ni tih sawiin, Haley chuan NKorea chuan a thiltih chu a tawpsan a hun tawh a ni, a ti. UN Security Council-in NKorea hrekna thar a siam an thlawp avangin Russia leh China chu a fak nghal bawk. NKorea-in ramdang nena insumdawn tawnna a kalpui zinga 90% hi China nena a kalpui a ni a, hei vang hian UN resolution siam chungchangah pawh China hi a pawimawh hle a ni, a ti.
Hetih lai hian NKorea foreign minister Ri Yong Ho chuan Inrinni-a UN-in an ram hrekna tur resolution a siam thar chu an pawm lo tih a sawi a, US sorkarin inbiakna neihpui a duh thu a sawi chungchangah pawh nuclear programme tihtawp phaha inbiakna neihpui an tum lo tih a sawi bawk.