Pakistan-a bomb puakah mi 22 an hliam
Pakistan-a Punjab province khawpui, Lahore-ah Thawhṭanni zan khan thei phurtu truck chhungah bomb a puak a, mi 22-in hliam an tuar.
Bomb puahna hmun hi Bund road area a ni a, he kawng hi prime minister hlui Nawaz Sharfi-a’n vawiina Lahore aṭanga Islamabad a panna tur kawng a ni. He thil thleng avang hian Pakistan Muslim League-Nawaz (PML-N) chuan Sharif-a kalna tur kawng hi ennawn a ni dawn tih a sawi.
Rescue official chuan truck chhunga bomb kam hi zan dar 9 vel khan a puak niin a sawi a, bomb puak hian a bul vel building tukverh darthlalangte pawh a nghawr keh vek niin a sawi. Truck dinna bula bike leh car ding eng emaw zat pawh bomb puak hian a tichhe bawk a ni.
Lahore khawpuiah hian pawikhawihna a thleng fo a, July 24 khan Taliban firfiak pakhat chuan Punjab Chief Minister Shahbaz Sharif-a office bulah thihchilh bomb a tipuak a, mi 27 an thi a, an zingah hian police-te pawh an tel. April thla khan thihchilh bomb puak avangin mi paruk an thi a, mi 15 in hliam an tuar bawk. February thla khan Punjab Assemby bula thihchilh bomb puak avangin mi 14 an lo thi tawh bawk.