Covid-19 kai enkawl dam nuai 7.2 chuang awm tawh

India ramah hripui lengin ziaawm lam pan thei lo mah se enkawl dam pawh an tam tawh hle a, nimin thleng khan hri kai zinga 7,24,578 chu dama puan an ni tawh tih sorkar report chuan a tarlang.

Ministry of Health and Family Welfare-in nimina report a tihchhuahah chuan hri kai hmuh chhuah thar 37,148 lai an awm leh a, heti hian nimin thleng khan hri kai hmuh chhuah 11,55,191 an awm tawh. Heng zinga 7,24,578 chu enkawl dam an ni tawh a, nimina sorkar report-ah chuan darkar 24 chhungin mi 24,491 chu dama puan an ni leh. Enkawl dam rate hi 62.72% a ni tawh a ni.

Niminah khan hri vanga thi 587 an awm belh leh bawk a, anni nen hian India ramah Covid-19 thihpui hi mi 28,084 an awm tawh. Sorkar laipui chuan state leh Union Terriroty-te chu testing capacity tipung tura hriattirin, laboratory tam zawk siam belh a ngai niin an sawi. Indian Council of Medical Research (ICMR) chuan nimina report an tihchhuahah darkar 24 chhungin Covid-19 sample 3,33,395 an test tih an tarlang a, hei nen hian hri len 

ṭantirh aṭanga nimin thleng khan sample 1,43,81,303 an test tawh.

Ramchhung hmun hrang hrangah ICMR pawmpui laboratory 1,274 a awm tawh a, heng zinga 892 hi sorkar laboratory niin 382 chu private laboratory a ni bawk. Real-Time RT PCR hmanna laboratory 651 a awm a, TrueNat Test kalpuina laboratory 516 awm bawkin lab 107-ah CBNAAT Test an kalpui bawk a ni. 

Thawhṭannia Delhi  khawpuia hri kai hmuh thar chu  954 a ni a, hei hi ni 49 hnua ni khata hri kai hmuh thar 1,000 an tlin loh ṭum khatna a ni. IIMS Director Randeep Gulera chuan Delhi-ah hri leng chuan a peak a thleng tawh nia a lan thu a sawi a, hemi rual hian inthlahdah a la hun lo hle tih a sawi nghal bawk. 

Thawhṭanni bik khan Delhi-ah sample 11,470 test a ni. Kar liam ta aṭang khan hri kai mek pawh hi a tlahniam ṭan a, hri kai enkawl dam erawh an pung chak hle a, recovery rate hi 85% dawn a tling pha tawh.