Maratha-te’n quota pek phutin kawng an zawh

Maratha hnamte chuan an hnam puala zirna-in leh sorkar hnaah reservation siam phutin nimin khan Maharastra state chhung hmun hrang hrangah kawng an zawh.

Nimina kawng zawh pui ber chu Mumbai-ah neih a ni a, he kawngzawh hi silent rally tih vuahin kawngzawhnaa telte chuan flag te an keng a ni.

Tun ṭum hi Marathan hnamten kawngzawh an huaihawt ṭum 58-na a ni a, nikum tun ang hunah khan Aurangabad-ah lungawi lohna an lo lantir tawh bawk a ni. Kawngzawh hi Maratha pawl hrang hrang inzawmkhawm, Sakal Maratha Samaj-te’n an huaihawt a ni.

Maharashtra Legislature Assembly session neih mekah pawh Maratha-te thil phut hi sawichhah a ni bawk. Member-te an au bengchhen avangin rorel inkhawm hi ṭum thum tihtawp a ngaih phah bawk. Chawhnu lamah chuan MLA eng emaw zat chu kawngzawhnaah tel turin House aṭangin an chhuak a ni.

Nimina Mumbaia kawngzawh te hi nuai nga an chuan rin a nih thu police offiical chuan a sawi. Maratha-te thil phut zingah hian sorkar hna leh zirna-ina an hna puala reservation siamsak bakah, SC leh ST (Prevention of Atrocities Act) dik lo taka hman tihtawp te, loneitute loan ba ngaihdam sak leh, thlai thar hralhna hman ṭha zawk siamte a tel a ni.