Sushma Swaraj-i’n Nepal tlawh dawn

External Affairs Minister Sushma Swaraj-i chuan Bay of Bengal Initiative for Multi-Sectoral Technical and Economic Cooperation (BIMSTEC) foreign minister meeting hmang turin vawiin hian Nepal a pan dawn.

BIMSTEC foreign mi­nister meeting vawi 15-na hman rualin, Swaraj-i hian Nepal ram hruaitute a kawm nghal dawn a ni. Official chuan, India leh Nepal chu inṭhianṭha, inzawmna nghet tak nei an ni a, India ram hruaituten Nepal an tlawh chuan ram pahnihte inlaichinna kawnga pawimawh hrang hrangte an sawiho ṭhin a ni, a ti.

Swaraj-i’n a tlawh hnu, August 23 khian Nepal Prime Minister Sher Bahadur Deuba chu ni nga cham turin India-ah a rawn zin dawn a, hei hi thla hnih kaltaa PM atana lakluh a nih hnua rampawn lama a zinchhuahna hmasa ber tur a ni ang. Nepal foreign minister Krishna Bahadur Mahara pawh India ramah rawn zin a tum bawk.

Sushma Swaraj-i hi September thla khian Bangladesh-ah Bangladesh-India Joint Consultative Commission (JCC) meeting hmang turin a kal dawn bawk. A zin tur thu hi tihchian ni tawh mah se, a ni tur erawh la relfel a ni lo. Hei Swaraj-i’n Bangladesh a tlawh ṭum hnihna tur a ni a, kum 2014 June 25-27 khan a lo tlawh tawh a ni.