India rama siam Aircraft Carrier hmasa ber PM-in hlan

Prime minister Narendra Modi chuan nimin khan India rama aircraft carrier siam hmasak ber, INS Vikrant chu Cochin Shipyard-a hun buatsaihah Indian Navy kutah a hlan. Ton 45,000-a rit indo lawnglian hi Rs vaibelchhe 20,000 senga siam a ni.

INS Vikrant hi a dung meter 262 leh a vang meter 62 niin, India rama indo lawng siam tawh zinga lian ber a ni. Aircraft 30, MiG-29K fighter jet leh helicopter-te a phur thei dawn a, crew 1,600 vel an awm thei bawk ang. Navy-a Warship Design Bureau (WDB) design niin,Ministry of Ports, Shipping and Waterways hnuaiah public sector shipyard, Cochin Shipyard Limited-in a sa a ni. Deck 14 leh compartment 2,300 a awm a, gas turbine pali, 88MV power a hmang a, maximum speed hi 28 knots a ni.

Prime Minister chuan INS Vikrant chu Aatmanirbhar Bharat mission hlimthla pawimawh tak a ni tiin, "India chu mahni ram chhung ngeia indo lawnglian siam theitu ram zingah a tel tawh a,Vikrant hian inrintawkna min pek belh a ni," a ti.

He indo lawnglian hi kum 10 chuang siam niin, trial pawh vawi tam tak neih a ni a, nikum August 12 khan trial thawh hnuhnung ber chu an lo nei tawh a ni. Navy kuta a awm hnuah aviation trial neih a ni leh ang.

India hian a hmain aircraft carrier hi pakhat ,INS Vikramaditya chauh la nei in hei hi Russian siam a ni.