Population control chungchangah SC-in sorkar laipui hriattirna pe

Supreme Court chuan India ram mipui pung zel avanga harsatna awm ṭhin venna atan sorkar laipui chu dan leh kaihhruaina siam tura petition thehluh chungchangah, nimin khan sorkar chu chhanna pe turin hriattir a pe.

Petition hi Akhil Bharatiya Sant Samiti-a general secretary Dandi Swami Jeetendranand Saraswatee thehluh a ni a, India ramah kumtin mihring an pun belh zel laiin, ramin a thil neihte erawh a pun belh loh avangin mihring pung zel hi a dawl reng thei dawn lo tih a sawi a ni. Hei vang hian sorkar chu mipui pung chak zel avanga harsatna awmte chinfel theih dan ngaihtuah a, dan leh kaihhruaina siam tura hrilh turin Supreme Court hi a ngen.

PIL thehluttu chuan retheihna leh hnathawh nei lo an pung zel a, food supply indaih lohna a awm a, healtcare facility leh thil dangte pawhin mipui pung zel chu a dawl zo dawn lo tih a sawi. Hei vang hian mihring pun belh zel avanga harsatna awm thei chungchangah, sorkar chuan mipuite fundamental rights venhimsak chungin dan leh kaihhruaina mumal tak a siam a ngai a ni, a ti.

Sorkar laipui chu thla tina Pathianni hmasa ber chu 'Health Day' ah puang a, mihring pung chak lutuk tur khuahkhirh a ṭul thute inzirtirna hun atana hmang a, contraceptive pills, condom leh vaccine siamna hun atante hmang tura a duh thu PIL a thehluhah hian a tarlang bawk.

India ram mipui hi tluklehdingawn 1.39 dawn an ni tawh a, hei hi khawvel puma mihring awm mek aṭanga 17.8% vel a tling a ni. Hetih lai hian khawvel pum huapin thlai chinna ram, agricultural land zinga 2% leh, tui thianghlim awm zinga 4% chauh India hian a nei thung. Petition thehluhah hian US-ah ni khatah nau piang 10,000 an awm laiin, India ramah chuan ni khata nau piang hi 70,000 zel an tling a ni, tiin a tarlang.