AIADMK inchhunfin leh dawn

Tamil Nadu-a rorellai, AIADMK chu pawl hniha an inṭhen hnuah an inchhunfin leh dawn.

Nikum December thlaa AIADMK hotu leh Tamil Nadu chief minister, J Jayalalithaa-i a thih hnu khan party hotu atan a thachhangdawltu atan, VK Sasikala-i chu ruat a ni. Sasikala-i hian a vahpa, TTV Dinakaran chu deputy general secretary atan a ruat zui a, hetihlaia Chief Minister ṭanglai O Panneerselvam chuan Sasikala-i tana hmun kianin a bang bawk a ni. Mahse Panneerselvam hian a duh thu ni loin Sasikala-i tana hmun kian tura nawr luih a nih tih sawiin, party chhungah buaina a awm zui a ni.

Sasikala-i hi chief minister atana lakluh a nih hmain, a sum lakluh phu loa hausaa puha eiruk thubuaiah thiam loh chantir a nih avangin man a ni a, Bengaluru jail-ah tantir a ni zui ta a ni. AIADMK chhunga buaina awm avang hian pawl pahnih, Sasikala-i lamṭang leh Panneerselvam lamṭang pawlah an inṭhen zui ta a ni.

Sasikala-i lamṭang ami, Chief Minister Edapaddi Palanisami chuan AIADMK pawl hnihte inzawmkhawm leh hi a duh a, nimin zing khan hemi chungchang ngaihtuah hian meeting a ko a ni. Ruahmanna an siam danah chuan pawl hnihte hi inchhunfin lehin, Panneerselvam chu Election Commission-in party hotu-a Sasikala-i ruat a nih chungchanga thutlukna a siam hma chu interim general secretary-a dah an rawt a ni. Palanisam chu chief minister a ni chhunzawm zel bawk ang.

Senior minister leh party hruaituten rawtna hi an pawm a nih chuan, Palanisami hian Prime Minister Narendra Modi hmuh a tum a ni. CM Palanisami hi nimin tlaia vice president thar atana M Venkaiah Naidu lakluh inkhawma tel turin Delhi-ah a awm a ni.

Panneerselvam pawhin a lamṭang zinga MLA pathumte chu minister-a dah an nih chuan rawtna siam hi a pawm theih tur thu a sawi a, minister atana duh tura a rawt zingah hian education minister hlui M Foi Pandiarajan pawh a tel. Mahse Panneerselvam chuan party an inzawmkhawm leh a nih pawhin Sasikala-i leh a chhungte chu party leh sorkar-a chanvo pek a duh lo tih a sawi bawk.