Vawiinah vice president thar lalut dawn

Vawiin hian M Venkaiah Naidu chu vice president thar atan rinawmna thu tiamtira lakluh a ni dawn.

Kum 68 mi, Venkaiah Naidu hian nimina a term zo, vice president kalchhuak Hamid Ansari a thlak dawn a ni.

Vice President lakluh inkhawm hi Rashtrapati Bhavan-ah neih a ni dawn a, President Ram Nath Kovind-a’n rinawmna thu a tiamtir ang. He hunah hian sorkar mi pawimawh hrang hrangte an tel ang.

August 5-a vice president thlannaah khan rorellai, BJP kaihhruai NDA candidate Venkaiah Naidu hian vote tla 771 aṭangin vote 516 a hmu a, a khingpui eptu candidate inṭawm Gopalkrishna Gandh chuan vote 244 a hmu a ni. Naidu hi Bhairong Singh Shekawat-a hnua BJP zingah vice president dinhmun chelh leh thei hmasa ber a ni.

Vice president kalchhuak, Hamid Ansari chu nimin khan Rajya Sabha-ah thlah a ni. Prime Minister Narendra Modi chuan Ansari chu fakin, ram danpui vawnhim tum tlattu a nih thu a sawi a, ram palai anga tawnhriat a lo neih tawhnate chuan Parliament Upper House-a chairman hna a thawhna kawngah nasa takin a pui a ni, a ti. Modi chuan amah ngei pawhin Ansari lak aṭang chuan hlawkna leh zirchhuah tam tak a neih thu a sawi bawk.

House Leader leh Finance Minister Arun Jaitley pawhin Ansari thlahna thu sawiin, kum 10 chhung House chairman hna zahawm takin a kengkawh a ni, a ti. A chairman chhung hian House-ah inhnial buai leh rorel buai zawnga thiltih pawh a thleng fo a, hei vang hian chairman hna chu hna huatak tak a nih thu a sawi a, eptu hruaitu Ghulam Nabi Azad pawhin house rorelna a kaihhruai danah Ansari chu a fak thu a sawi bawk.