UP damdawi-inah ni nga chhungin damlo 60 thi

Uttar Pradesh-a Go­rakh­pur district-a sorkar damdawi in, Baba Raghav Das College Hospital-ah kar kalta khan ni nga chhung­in damlo enkawl zinga mi 60 an thi a, an zing­ah hian naupang 30 an tel. Nimin thleng khan thi zat hi mi 70 an tling tawh a ni.

Hospital hian leiba a ngah avangin oxygen supply tihtawp sak a ni a, oxygen a awm loh avang hian damlo enkawl laite chuan an thih phah nia sawi a ni. Mahse state official-te chuan oxygen supply tihtawp chu damlote thihna thlen phahna hi a ni lo niin an sawi thung.

Kar kaltaa damdawi-ina thi zinga a tam zawk hi thluaka khawsik lut, encephalitis veite an ni. Ningani leh Zirtawpni khan he damdawiin-a damlo enkawl lai 30 zet an thi a ni.

District official Anil Kumar chuan hospital hian leiba a ngah avangin oxygen bur supply-tute nen an inkarah harsatna a awm ngei a, mahse thihna thlen chhan hi hei vang hi ni loin, damlo tam tak chu serious tak an nih hnuah damdawiin panpui chauh an nih avangin an chhan hman lo nia a ngaih thu a sawi. State sorkar hotu ṭhenkhat chuan damlote hi ngaihthah an nih avanga thi nia an ngaih thu an sawi bawk.

State Heath Minister Sidharth Nath Singh pawhin damlote chu oxygen pek tur awm loh avanga thi an ni loh thu a sawi a, kum thum kalta chhung pawh khan August thla chhunga he damdawiina thi awm zat chu mi 19-22 te an tling ṭhin niin a sawi. Minister chuan hospital hian oxygen bur a tlachham lo a, darkar hnih khat vel chu bur pek chhuak tur awmloin a khaihlak a, mahse hemi chhung pawh hian manual resusictation procedure hman a ni, a ti.

Hospital pawhin thu­chhuah siamin, thawktute pawhin oxygen cylinder awm zatte an enfiah nghal tih sawiin, oxygen bur chu a tlem avanginreserve cylinder pawh ruahman nghal a ni thu a sawi. Gorakhpur hi Chief Minister Yogi Adityanath-a bial a ni a, CM hian Baba Raghav Das College Hospital hi a tlawh tawh a, hemi hnua chanchinthar lakhawmtute a kawmnaah thu dik tak chauh chhuah turin a ngen. CM chuan, hospital-a thil awmdan chhui chiang turin sorkar chuan committee a din nghal a, report nghah mek a nih thu a sawi. Hospital-a thawkte inthlahdah avanga naupang tam tak thihna hi thleng a nih chuan sorkar chuan mawhphurtute chungah na takin action a la dawn a ni, a ti.

Yogi Adityanath chuan Prime Minister Na­rendra Modi pawhin an state-a thil thleng chu a ngaihven hle a, thil awmdan thlithlai turin Union Health Minsiter JP Nadda pawh a tir a ni, a ti. Union Minister JP Nadda hian sorkar laipui chuan Gorakhpur-ah cheng vaibelchhe 85 senga Viral Research Centre dahna tur pawh a pawmsak tawh niin a sawi.

Hetih lai hian eptute chuan Yogi Adityanath-a chu Chief Minister a nihna aṭanga bang turin an phut. UP Congress president chuan BRD hospital-a hun reilote chhunga damlo 70 zet thihna thlengah hian state sorkar chu mawhphurtuah puhin, hei hian state sorkar hlawhchham zia a tilang a ni, a ti. CM chuan a bial mite mamawh a ngaihtuahsak thei lo a nih chuan state pum enkawl tura mawhphurhna la tlak loah an ngaih thu an sawi bawk.