J&K-a inbeihnaah hel 3 leh sipai 2 thi

Jammu and Kashmir-a Shopian district-ah Inrinni zan aṭanga Pathianni zing thleng khan sipai leh firfiakte an inkap a, firfiak pathum kahhlum an nih bakah sipai pahnihin nunna an chan bawk.

Shopian district-a Aveneera khuaah police leh Indian army-te’n hel dap hna an thawh laiin, firfiakte hian an bihrukna hmun aṭangin an lo kap hmasa a ni. Security force-te hian kap let ve nghal mah se, tualchhung mi ṭhenkhatte chuan security force-te hi lungin an lo tawng bawk.

Jammu and Kashmir police director general, SP Vaid chuan niin zing khan firfiak pathum kahhlum an nih thu a sawi a, inbeihnaah hian sipai pahnih Sepoy Ilayaraja P leh Sepoy Gowai Sumedh Waman an thi bawk tih a sawi.

Kashmir hmarlam, Bandipora-ah Inrinni vek han firfiakten police pa­hnih an kap hliam a, Srinagar-ah petrol bomb puakah civil mi pakhat a thi bawk.