India ram hmun hrang hrangah tuilian leh leimin avangin harsatna thleng nasa

Ramchhung hmun hrang hrangah ruahsur nasa avanga tui­lian leh leimin thlengah mi tam takin harsatna an tawk mek.

Assam, Meghalaya, Bihar, Himachal Pradesh leh West Bengal state-te chu harsatna tuar nasa zual an ni. Hmarchhak bialah tuilian vang hian rel service pawh a khaihlak a, Assam-ah chuan tuilian tuar hi mi nuai 23 an tling tawh. Meghalaya-ah pawh ruahsur nasa tak avangin harsatna an tawk mek a, Met Department chuan Nilaini thlengin Meghalaya leh Assam-ah hian ruah a la sur chhunzawm dawn tih a sawi.

Bihar-ah chuan ruahsur nasa avangin Kishanganj, Purnea, Araria leh Katihar district-ahte tui a lian a, tuilianin harsatna a thlen avangin rel service eng emaw zat cancel a ngaih phah bawk. Chief Minister Nitish Kumar chuan harsatna tawk mekte chhanchhuah leh chhawm­dawl hna thawk turin National Disaster Response Force (NDRF) company 10 leh Indian Air Force helicopter tir turin a ngen. Bihar-ah hian tuilian avangin mi 13 in nunna an chan tawh a ni.

West Bengal-ah pawh mi pathumin nunna an chan tawh a, mi nuai nga chuangain harsatna an tawk mek. Tuilian avang hian Cooch Behar district chu tlawhpawh theih lohin a awm a, rel service pawh tihtawp a ni. Cooch Behar-ah hia mi nuai 2.87 chuan himna zawngin an in leh lo an chhuahsan a, Malda, North Dinajpur, Darjeeling leh South Dinajpur district-ahte mi tam takin an in an chhuahsan tawh bawk.

Himachal Pradesh-ah chuan leimin nasa tak avangin mi 48 in nunna an chan tawh. Leimin hian Mandi khuaah kawng meter 150-a thui kawngpui a min chhia a, in, bus pahnih leh motor dangte a chim hnan a ni. Chief Minister Virbhadra Singh chuan leiminna hmun hi tlawhin, thi chhungte chu cheng nuai nga ṭheuh pek an nih tur thu a puang.

Gujarat pawhin tuilian a tuar mek a, kumin chhungin tuilian vanga nunna chan hi mi 218 an tling tawh a, an zinga mi 61 chu Banaskantha district ami an ni. Ruahsur nasa leh tuikhuah tui paihchhuah avanga tuilian hi mi nuai 4.5 velin an tuar mek a, mi 39,000 chu hmun him lamah sawnchhuah an ni tawh a, kar hmasa khan tuilian tuar mi 11,400 chu Army,Air Forc leh National and State Disaster Response Force-te’n an chhanchhuak.

State 20 ten ruahsur nasa vang hian harsatna an tawk mek a, sorkar­in report a dawn danin fur ruahsurin chhiatna hrang hrang a thlena thi zat hi mi 600 an tling tawh a, ranvulh 24,811 an thi a, chenna in 63,215 a chhia a, thlai chinna ram hectare nuai 2.8 chu tuilian leh leiminin a tichhe tawh bawk.