Rohingya-te thawn haw turin state hriattir

Sorkar laipiu chuan state hrang hrang hnenah an state-a dan loa Rohingya Muslim lutte chu chhinchhiah a, thawn kir turin a hriattir. Rohingya te chu India ram himna tiderthawng thei an nih thu a sawi bawk.

Kar hmasa khan state hrang hrang sorkar hnenah lehkha hi a thawn a, Ministry of Home Affairs-a joint secretary Dilip Kumar chuan dan loa India rama pem lutte chu firfiakte tan an pawla sawmluh an awlsam niin a sawi. Dan loa pemlutte chuan ram himna dinhmun thlengin an tiderthawng thei a ni tih Kumar chuan a sawi.

India ramah hian United Nations High Commissioner for Refugees hnuaia inziaklut Rohingya 14,000 vel an awm a, hetihlai hian dan loa lut mi 40,000 vel an awm bawk a ni. Dan loa lutte hi Bangladesh leh Myanmar ramah thawn kir theih an nih thu state hnena lehkha thawnah hian hriattir an ni a, dan loa ramdang mi awmte dapchhuah hna thawk turin district level task force din turin state sorkar hriattir an ni bawk.