Gorakhpur tragedy : BRD Medical College Nodal officer ban

Uttar Pradesh-a Gorakhpur district-a Baba Raghav Das Medical College Hospital-ah ni reilote chhungin damlo enkawl lai 70 chuang an thi a, Congress party chuan he thil thleng chungchang hi Supreme Court enpuina hnuaiah chhui chian a phut.

Uttar Pradesh sorkar chuan BRD hospital-a Department of Pediatrics-a Nodal Officer Dr Kafeel Khan chu a ban tawh a ni. Mahse Congress chuan Supreme Court enpuina hnuaiah thil awmdan hi chhuichian ngei an phut tih a sawi.

BRD Medical College-a ni reilote chhunga mi tam tak chunga thihna thlen chhan hi hospital-in oxygen supplier hnena leiba a ngah avangin a pechhuak duh tawh lo a, damlote hnena oxygen pek tur an tlachham nia sawi a ni. Mahse Chief Minister chuan hospital hian hetiang lama harsatna a neih chungchang hi thuneitute lamah an thlen lo niin a sawi. Harsatna an neih leh neih loh chungchang an zawh pawha engmah an sawilan loh avangin college principal RK Mishra chu a dem thu a sawi. Mishra hi kar kalta Inrinni kha a hnaa inthlahdahah puhin Medical Education Minister Ashutosh Tandon chuan a lo suspend tawh a ni.

Hetihlai hian hospitala tana fund pekchhuak kawngah thil fel tawk lo a awm nia sawi a ni thung. Gas supplier Pushpa Sales Company, Principal RK Misrha leh medical education department-a thuneitute chuan an bill ba chungchang hi vawi tam tak hriattir an ni a, mahse sorkar thuneitute lam aṭangin chhanna an dawng lo nia sawi a ni. Principal pawh hian sorkar hnenah an harsatna tawh mek hi ṭum thum a thlen nia sawi a ni bawk. Mahse supplier hnena an leiba hi damlo tam tak thihna a thlen hnu, August 11 khan pek a ni ta chauh a ni.