Ram pumah Independence Day lawm

Indepedence Day vawi 71-na chu nimin khan ram pumah lawm a ni a, a lawmna pui ber New Delhi-a Red Fort-ah Prime Minister Narendra Modi chuan hnam puanzar pawtpharhin, ram mipuite hnena thuchah a sawi.

PM Modi hian Independence Day-a thu a sawi vawi li-na a ni a, tun ṭuma a thusawi tur chungchangah hian rawtna thehlut turin mipuite a chah a, message 8,000 chuang zet a dawng a ni. Modi hian thu a sawi rei loh tur thu thla hmasaa a radio programme, Mann Ki Baat-ah a lo sawilang tawh a, a intiam ang ngeiin minute 54 thu a sawi a, kum li kalta chhunga I-Day lawmnaa PM thusawi zingah chuan a la reilo ber a ni. Nikum khan minute 94 chhung thu a sawi a, kum 2015-ah minute 86 leh 2014-ah minute 65 thu a sawi a ni.

PM hian ramchhunga mipui pungkhawmten tharum thawhna an thlen ṭhin chungchangte, Jammu and Kashmir tualchhung buaina thleng mek chungchangte a sawi bakah, kum 2022-a India-in zalenna a hmuh aṭanga kum 75-ah India thar, New India din tura a hmalakna leh a hma­thlirte a sawi.

Kum 2022-ah chuan India ram thar, New India dingin retheihna umbo a ni tawh ang a, miretheiten concrete in te neiin, loneitute pawh an thlai thar aṭanga an sum lakluh te a letin a pung ang a, ṭhalai leh hmeichhiate tan hun ṭha leh remchang zawk a inherchhuak tawh ang a, India chu chi inthliarna, firfiaka chetna, eirukna, induhsak bikna lak aṭangin a zalen tawh ang a, ram fai leh thianghlim a ni tawh ang, tiin PM chuan a sawi. India thar din a nih theihna tur hian ṭhalaite chu tumruhna nen theihtawpa thawk turin a chah bawk.

Ram venhim hna thawktu sipaite fakin, PM chuan India-in Pakistan rama surgical strike a neih chuan khawvel hmuhah India chakna a tilang a ni, a ti. Army, Navy leh Air Force-ah sipai tinte chuan ram tan tha an thawh a ni tiin, heng sipaite hi ram tihchhiat tumte lakah nghet takin an ding zel dawn a ni, a ti.