UN hotuin Rohingya refugee thawnkir tum ngaihven

Sorkar laipuiin state hrang hrang hnenah an state-a dan loa Rohingya Muslim lutte chu an rawn kalna ramah thawn kir leh vek tura a hriattir chungchang chu, United Nations Secretary General Antonio Guterres chuan a ngaihven hle niin a thupuangtu chuan a sawi.

Minister of State for Home Affairs Kiren Rijiju chuan Parliament-ah sorkar laipuiin state thuneitute hnenah an state-a dan loa raltlan lutte chu zawngchhuak a, thawnkir leh turin a hriattir tih a lo sawi tawh a ni.

Guterres-a thupuangtu Farhan Haq chuan hemi chungchang hi sawichhuakin, raltlante enkawl an nih dante chu an ngaihven hle tih a sawi a, refugee-te chu an in register a nih chuan tihhlum mai thei din­hmuna an dinna, an ram tlanchhiatsan lamah chuan thawn kir mai tur an ni lo, a ti.

Hetih lai hian India ramah UN refugee agency hnuaia in register Rohingya 14,000 vel an awm a, mahse dan loa lut tam tak an awm vangin Rohingya awmte hi mi 40,000 vel nia hriat a nih thu, Rijiju chuan a sawi a, heng te hi Jammu and Kashmir, Hyderbad, Haryana, Uttar Pradesh, Delhi leh Rajasthan-ahte an awm a ni, a ti. Dan loa raltlan lutte chu ram himna dinhmun tiderthawng thei an nih thu a sawi bawk.