JDU thiltih danah party president hlui lawm lo

Bihar-a rorellai, Janata Dal United chuan an party president hlui, Sharad Yadav-a thlawptu nia puh party hruaitu 21-te chu Thawhṭanni khan a suspend, hei vang hian JD(U) hi chhunga buaina chuan buai lam a pan zel rin a ni.

Bihar Chief Minister leh JD (U) hotu, Nitish Kumar-a’n Congress leh RJD nena an thawhhona, Grand Alliance chhuahsana BJP a thawhpui avangin Sharad Yadav hi a lungawi lo hle. JD(U) leh BJP in ṭangrual sorkar thar an siama chief minsiter atana Nitish Kumar lakluh a nih ṭum pawhin a tel duh lo a ni. JD (U) hian Rajya Sabha-a an party hruaitu a nihna aṭangin Yadav hi an ban tawh bawk.

JD(U)-in party hruaitu an hremte hi Yadav-a thlawptu vek an ni a, an zingah hian minister, MLA leh district level office bearer hluite an tel a ni. Yadav-a chuan district pathum a tlawhkual hnuah party chuan amah thlawptu hruaitu 21 a ban nghal a, a la zin kual zel dawn a, hei vang hian amah thlawptu pawh an la pung zel tih a sawi.