Jharkhand CM-in fiahna a paltlang ; BJP MLA lungawi loin an chhuak tau

Jharkhand chief minister Hemant Soren chuan nimin khan assembly-ah fiahna a paltlang. Jharkhand-a rorellai, Jharkhand Mukti Morcha (JMM) kaihhruai ṭangrual sorkar chuan BJP chu helna chawkchhuak a, sorkar paihthlak tumah a puh.

Nimina Assembly special one-day session neihah hian rorel an kalpui chhung zawng eptu pawl, BJP lam chuan lungawi lohna an lantir a, sorkar fiahna neiha vote lak dawnah House aṭangin an zui bawk.

Vote thlak hmaa thu a sawiah, Hemant Soren chuan BJP chu ramchhungah inthlana hnehna an chan theihna tur a nih phawt chuan civil war hunlai anga buaina chawhchhuah tumah a puh. A kaihhruai sorkar paihthlak a nih theihna atana Jharkhand MLA-te sum hmanga lei tumnaah pawh Assam chief minister, BJP hruaitu Himanta Biswa Sarma chu inhnamhnawihah a puh a ni.

"Eptute hian mipui rorelna an tichhia a ni. BJP hi legislator-te sum hmanga thlem thluk tumin an hmanhlel hle. House-ah kan chakna kan lantir ang," tiin BJP MLA-te aubuaina karah Chief Minister chuan a sawi. "Mipuiten thawmhnaw, ration leh chawhmeh te an lei ṭhin tih kan hria. Mahse BJP-te chauh hi legislator-te lei tum an ni," a ti.

Sorkar fiah anih hma hian ṭangrual sorkar-a MLA-te chu Chhattisgarh-ah hruai an ni a, nimin khan an state khawpui Ranchi-ah hruia kir an ni. BJP lamin lei tuma an thlem tur vengin Congress sorkarna, Chhattisgarh-a luxury resort-ah an dah khawm a ni. Ranchi lama hruai kir an nih hnuah state guest house-ah awm khawm tir lehin, heta aṭang hian assembly house-ah hruai an ni.

Engvanga trust vote lak duh nge a ni tih zawhna chhangin, Hemant Soren chuan "Tu in nge trust vote la ang? Eptu lamin maw?" tiin, "Eptute hian dawt thuthang hmanga paihthlak min tum a ni. Anmahni thang vekah an inawk dawn a ni," a ti.

BJP chuan Hemant Soren chu inthlan kaihhruaina dan bawhchhiaah leh mining lease a inpek avangin MLA aṭanga ban an phut. Inthlan buatsaih ṭha tura ngenin, Chief Minister chu a tih dik lote inpawma bang turin an ngen a ni.

Soren leh a party, JMM chuan an buaina neih chu BJP hian hman ṭangkai a, rorellai MLA-te thlem chhuah a, sorkar paihthlak tumah an puh. Maharashtra, Madhya Pradesh leh Karnataka-ah pawh BJP hi verther taka cheah an puh.

Jharkhand-a ṭangrual sorkar hian assembly member 81 awmna, Assembly-ah hian MLA 49 an nei a, majority nei turin seat 41 neih phak a ngai. Party lian ber JMM hian MLA 30 neiin, Congress-in 18 , Tejashwi Yadav kaihhruai Rashtriya Janata Dal (RJD)-in pakhat an nei ve bawk. Eptu party lian ber BJP hian MLA 26 an nei thung a ni.