Ni 4 cham turin Bangladesh PM-in India tlawh

Bangladesh prime minister Sheikh Hasina chu ni li cham turin nimin khan New Delhi a thleng.

Sheikh Hasina hian a cham chhungin hruaitu hrang hrangte a hmu dawn a, ram pahnihten thawhdunna thuk zawk an neih theihnan inremnate ziakin, water management, railway leh science and technology lamah thawhdunna kawng sarih vel an ziah theih beisei a ni.

Hasina hian president Droupadi Murmu, Vice President Jagdeep Dhankar bakah prime minister Narendra Modi-te a hmu dawn a, external affairs minister Dr S Jaishankar nen an inkawm bawk ang.

Bangladesh Prime Minister hian hian Confederation of Indian Industries (CII) huaihawt bussiness event a hmanpui nghal dawn. Bangladesh sorkar buatsaih, Mujib Scholarship chu 1971 Liberation War of Bangladesh-a nunna chhan leh hliam tuar, Indian Armed Force mi leh sa chhungte 200 hnenah a hlan dawn a ni. Hasina hi an ram foreign minister Dr AK Abdul Momen bakah official ṭhahnem takin an rawn ṭawiawm a ni.

Momen chuan venhimna lama thawhdunna kaihhnawih te, investment, sumdawnna lam tihhmasawn, power leh energy sector lama thawhdunna, tuipui inṭawm dan turte, lui tui luan dan chungchanga ruahmanna siam te, ramria inkaihhruaina leh ruihhlo tawlhruk tihrem dan tur leh mihring hmanga sumdawnna tihtawp a nih theih dante chu Hasina leh Modi-te inbiaknaa ngaihpawimawh zual tur te an ni tih a sawi.