Tuilian avangin mi 200 an thi tawh ; Hmun hrang hrangah tuilian tuartu an pung zel

Ramchhung hmun hrang hrangah ruahsur nasa avangin tui a lian a, mi tam takin harsatna a tawk mek. Ram pumah kumin fur ruahsur nasa avanga tuiliana thi zat hi mi 200 an chuang tawh a ni.

Bihar chu state hrang hrang zinga tuilian tuar nasa ber pawl niin, mi maktaduai 69.81 velin harsatna an tawk mek a, tuilian avang hian mi 56-in nunna an chan tawh a ni. District 13-ah tuilian hian harsatna a thlen mek a, chenna-in tam tak a len chhe tawh a, kawng leh lei pawh tam tak a chim chhe tawh bawk.

Bihar Chief Minister Nitish Kumar chuan Thawhlehni khan thlawhtheihna hmangin tuilenna bial hrang hrangte hi a enkual a, official-te chu chhanchhuah leh chhawmdawl hna chak zawka kalpui turin a ti. Nitish Kumar hian Prime Minister Narendra Modi leh Union Home Minister Rajnath Singh-te hnenah puihna a dil tawh bawk a, anni pawhin an theih anga puih an tiam a ni.

Bihar-a tuilian tuarte chhanchhuah hna hi Army, Air Force leh National Disaster Response Forece leh Bihar State Disater Response Force team-te’n an thawk a ni. Tuilia hian relkawng a chim avangin rel service eng emaw zat pawh a khaihlak tawh bawk.

West Bengal hmarlama district panga mi nuai khat velin an tuar mek a, heng zinga 60,000 chu Jalpaiguri leh Alipurduar district ami te an ni.

West Bengal Chief Minister Mamata Banerjee-i’n a hriattir angin tuilian tuarte chhanchhuah leh chhawmdawl hna hi chhun zan zawma thawh a ni a, tuilian tuartu tam tak chu chenna tur an neih loh avangin relief camp-ah an khawsa mek a ni.

Uttar Pradesh-ah pawh district ṭhenkhatin tuilian an tuar a, Chief Minister Yogi Adityanath-a chuan thlawhtheihna hmangin tuilenna bialte hi a tlawhkual tawh a ni. CM chuan harsatna tawk mekte chhawmdawl hna thawkna kawnga hna thawk ṭha tawk loa puh official pathum a suspend a, Gonda chief medical officer pawh a sawn bawk. Official hna thawk ṭhalote laka action a lak zel tur thu a sawi.

Uttarakhand-a Pithoragarh district-ah pawh tuilian avangin mi 17-in nunna an chan a, chin hriat lohin mi 30 chuang an awm mek a, an zingah hian sipai panga an tel. Chin hriat loha awmte hi tuilian hian Kashi luiah a len lut nia rin an ni a, zawn hna thawh mek a ni.

Bengaluru-ah pawh Thawhṭanni zan rei tawh lamah khan ruah a sur nasa hle a, kum 1890 hnu lamah ruah a sur nasat ber ṭum nia sawi a ni. Ruahsur nasa avang hian khawpui chhunga hmun hniam lama awm chenna-in, kawng leh motor dingte chu tuiin a chim nasa hle.

Hmarchhak state hrang hrang pawhin tuilian hi an tuar mek a, Assam leh Meghalaya-te chuan tuar nasa zualin, tuilian leh ruahsur nasa avanga chhiatna dang thlengah mi eng emaw zatin nunna an chan tawh a ni.