Rahul-a’n Indira Canteen a hawng

Congress vice president Rahul Gandhi chuan nimin khan Bengaluru-ah Karnataka sorkar flagship programme Indira Canteen a hawng.

Rahul Gandhi chuan Indira Canteen chu mi rethei leh pem lut, beiseina sang nei chunga Bengaluru khawpui pantute tana siam a ni tih sawiin, Bengaluru khawpuiah mi tumah rilṭam leh ei tur neiloin an awm tur a ni lo a, hemi atan hian canteen hi siam a ni, a ti. State sorkar chu faina lam ngai pawimawh turin a ngen nghal bawk.

Chief Minister Siddaramaiah chuan Indira Canteen chu Congress party-in Karnataka-a mi rethei ei tur neilo awm lohna hmuna siam tuma a hmalakna peng pakhat a nih thu a sawi. “Thuneihna kan chan tirhin Anna Bhagya scheme hnuaiah mi vaibelchhe 4 chuang hnenah buhfai kg 7 kan pe nghal a ni. Kum thum kalta chhung khan khawkheng nasa tak avanga harsatna kan tawk chungin, ei tur neih loh vanga thi report an awm lo. He programme chhunzawm zel na atan hian Indira Canteen hi din a ni”, a ti.

CM chuan he programme hi state chhunga district tinah kalpui a nih tur thu a sawi a, an programme dodaltu chu mi rethei leh chhumchhiate dodaltu an ni, tiin a sawi. Siddaramaiah chuan Prime Minister Narendra Modi chu sawiselin, pawisa a tih thih chu mi retheiten an tuar niin a sawi bawk.