India-ah sample nuai 11 chuang test tawh Covid-19 kai mi 42,000 chuang awm

Indian Council of Medical Research (ICMR) chuan nimin zing dar 9 thleng khan coronavirus kai leh kai loh enfiahin, sample 11,07,233 test a ni tawh tih a sawi. 

Nimin thleng khan ram pumah hri kai hi 42,533 an tawm tawh a, mi 1,373 in an thihpui tawh a ni. Pathianni khan hri kai thar hi mi 2,553 awmin, hemi ni vek hian mi 72 chu Covid-19 vangin an thi. Hetih lai hian hri kai zinga mi 11,707 chu enkawl dam an ni tawh thung. 

n    Andhra Pradesh chuan sample 1,14,937 a test tawh a, heng zinga  1,13,354 chu a negative a ni. State chhung­ah hri kai hi 1,583 awmin,  mi 33 in an thihpui tawh. 

n    Kerala chuan sample 32,217 a test tawh. Heng zinga 31,611 chu negative an ni. Kerala-ah hian hri kai hi 500 an awm a, mi pali an thi tawh a ni. 

n    Tamil Nadu chuan sample 1,50,107 a test tawh a, test zinga 3,023 hi an positive. Sample 1,564 result nghah  mek a la ni bawk. Hri kai zinga mi 30 an thi tawh. 

n    Telangana chuan sample test tawh zinga  1,081 an positive a, mi 29 in an thihpui tawh bawk. 

n    Karnataka-ah sample 74,898 test a ni tawh a, 614 chu positive-in sample 70,998 a negative. He state-ah hian Covid-19 vanga thi  mi 295 an awm tawh a ni. 

n    Maharashtra chuan sample 1,70,139 a test tawh. Heng zinga 1,56,078 chu a negative a, 12,974 chu an positive thung. Mi 549 hi hri hi an thihpui tawh a ni.  

Union health ministry chuan ram chhunga hri leng hluar zualna district 20-ah central public health team tirh a ni dawn tih a sawi. Ministry-in hri leng hluarna red zone a siam hi ram chhungah district 130 an la awm. 

Heng district-te hi Maharashtra, Madhya Pradesh, Gujarat, Delhi, Rajasthan, Uttar Pradesh, Telanganga, Tamil Nadu, West Bengal leh Andra Pradesh-a mite an ni. Central team-ah hian National Centre for Disease Control (NCDC), AIIMS, JIPMER leh All India Institute of Hygiene and Public Health aṭangin expert-te an tel a ni.