Congress-in inhlawhfate hawnna tur tumsak dawn

Indian National Congress (INC) chuan Covid-19 leng vanga state danga inhlawhfaa awm tangkhangte hawnna tur rel chuan man chu peksak an tum tih  Sonia Gandhi chuan a sawi.

Sonia chuan inhlawh­fate hawna tura sorkarin rel a buatsaih rual chuan an chuanna man pawh tum vek se a duh tih a sawi. Sorkar hmalakna hi a ṭhat rualin, hri leng vanga hun rei tak hna thawk thei loa an awm avangin sum lamah heng mite hian harsatna an tawk nasa hle a ni, a ti.  

Heng harsatna tawk mek, inhlawhfate hi kan ram economy ruhrel leh ram hmasawnna atana kan ambassador-te an ni, tiin Congress hruaitu chuan a sawi. 

Hetihlai hian sorkar lam chuan inhlawhfa,  hri leng vanga state danga tangkhangtate hi an hawna tur senso 85% chu an buaipui sak thu tarlangin, a dang 15% chu an hawna tur state/UT sorkar tum tur a nih thu an tarlang. 

Sonia Gandhi chuan Prime minister Narendra Modi kaihhruai sorkar chu na tak beiin, "PM Corona fund-ah Rail Ministry-in Rs vbc 151 a thawh theih chuan eng vangin nge heng mite hawna tur hi a tihsak theih loh bik ang?" a ti. State tina INC Pradesh Congress Committee chuan an bial chhung ṭheuhah inhlawhfaa awmte hawna tur pawisa leh harsatna neihte hi a buaipui  dawn a, an state-a an haw theih nan hma a la ang tiin Sonia chuan a sawi. 

Maha CM-insorkar laipui ngen

Maharashtra chief minister Udhhav Thac­keray pawhin sorkar laipui  hnenah,  inhlawhfa hmun danga tangkhang mekte chu an hawna tur rel chuan man chawi tir lo turin a ngen ve bawk. 

Thackeray chuan inhlawhfaa chhuakte hi chhungkaw rethei tak tak an ni tih sorkar laipui chuan hriatpui se a duh thu sawiin, hri leng vanga inkharkhipna hun rei tak kalpui chuan an sum lakluh pawh a nghawng hle a ni, a ti. An chungah khawngaihna lantirin, Railways pawhin an rel chuan man hi a dil lo se a duh tih a sawi.