Nitish Kumar-a'n Rahul Gandhi a hmu

Bihar chief minister Nitish Kumar chuan Thawhṭanni zan khan Congress party hruaitu, Rahul Gandhi chu Delhi-a a chenna inah a hmu a, Delhi chief minister Arvind Kejriwal pawh kawm a tum.

Nitish Kumar hian a kaihhruai, Janata Dal-United (JDU) leh BJP thawhdunna a tihtawp hnuah, kum 2024-ah eptu ṭangrual din a nih theihna atan hma a la nia sawi a ni. Hemi rual hian Prime Minister dinhmun chuh tumna a nei lo tih a sawi.

Kumar chuan, "Regional party hrang hrangte tihchhiat tuma hmalakna a awm a ni. Ka tum ber chu ram inthlanpui neih leh hmaa eptu party hrang hrangte thawhhona siam a ni. PM candidate nih tumna erawh ka nei lo," a ti.

Delhi-a a cham chhung hian hruaitu eng emaw zat hmuh a tum a, an zingah hian Aam Aadmi Party (AAP) hruaitu, Delhi CM Kejriwal leh Janata Dal Secular hruiatu HD Kumaraswamy te pawh an tel.

Anni bakah National Congress Party hotu, Sharad Pawar pawh Kumar hian meeting neihpui a tum bawk. Pawar hian kum 2019 khan eptu ṭangrual pawl din a nih theihna turin hma a lo la tawh a ni.

JDU chuan Bihar CM hian 'Mission Opposition' a kalpuinaah hian Maharashtra, Haryana leh Karnataka-te pawh tlawh a tum niin a tarlang.