Bengaluru khawpuiah tui a la lian zel

Karnataka state khawpui, Bengaluru hmun eng emaw zat chuan ruahsur nasa avangin tuilian an la tuar chhunzawm zel.

Khawpui chhunga kawngpui pawimawhte tuiin a chim nasat avangin traffic thlengin a buai phah hle.

Karnataka chief minister Basavraj Bommai chuan an khawpuiin harsatna nasa tak a tawh mekah sorkar hmasa, JDS-Congress sorkar chu a mawhpuh. "Sorkar hmasa tena ruahmanna mumal an neih loh avangin he chhiatna hi a thleng a ni," a ti. Bengaluru khawpuiin harsatna a tawh mek siamṭhatna atan hian Rs vbc 300 pek a ni dawn tih a sawi bawk. Hemi hma hian tui paihchhuah hna thawhna atan hian Rs vbc 1,500 pek a lo ni tawh a ni.

Hmun tam takah power supply an nei thei lo a, Mandya-a pumphouse chu tuilianin a chim avangin veng eng emaw zatin tui thianghlim in tur an dawng thei rih lo bawk. Chief Minister chuan tui supply khaihlakna hmunah tanker hmangin tui sem a nih tur thu a sawi.

Tuilian hian chenna in 430 chu luah tlak lohin a tichhe tawh a, in dang 2,188 pawh a ṭhen lai an chhe bawk. Kawng km 225 thui a chhe tawh bawk a ni.

Ruahsur leh tuilianin harsatna a thlen dante zirchiang turin central lam chuan Bengaluru hi a pan dawn a, thil awmdante an zirchian hnuah memorandum thehlutin, hemi hnu hian state sorkar leh team member-te chuan meeting an nei zui ang.

Weather department chuan Karnataka chhim leh hmar lamah ni li chhung ruah nasa takin a la sur chhunzawm dawn niin an sawi.