Delhi Police-ten motor 5,000 chuang rutu an man

Delhi Police-te chuan motor 5,000 chuang ru tawh leh, dan kalha ralthuam supply ṭhin nia puh Anil Chauhan chu Thawhṭanni khan New Delhi-ah an man. Anil Chauhan hi Assam sorkar hnuaia Class-1 contractor ni lai a ni.

Police-te chuan kum 1998 aṭang khan Anil Chauhan leh a pawlte hian India ram chhung hmun hrang hrang aṭangin motor hi 5,000 chuang an ru tawh tih an sawi. Hei bakah hian kum 52 mi, Chauhan hi ralthuam tawlhnaa inhnamhnawih a, Uttar Pradesh aṭangin ralthuamte hi hmarchhak-a helpawl hrang hrang hnenah a supply ṭhin niin an sawi.

Chauhan hi a hma chuan Delhi-a Khanpur area-ah khawsain autorickshaw a khalh ṭhin a, kum 1995 aṭang khan car ruk hi a ching ṭan nia sawi a ni. An car ruk hi Nepal, Jammu and Kashmir leh hmarchhak state-ahte an hralh ṭhin a, an motor ruknaah hian taxi driver ṭhenkhat pawh a that nia puh a ni bawk.

Tezpur, Assam-ah pemin, dik lo taka a sum hmuh hmangin nuamsa takin a khawsa a, Delhi, Mumbai leh hmarchhak state dangah hmun eng emaw zat a nei. Assam-ah hian goverment contractor ni chhoin, tualchhung hruaitute nen pawh an inti ṭha hle.

Chauhan hi a hmain ṭum eng emaw zat man a lo ni tawh bawk. Kum 2015 khan Congress MLA pakhat nen man niin, kum nga jail-ah a tang a, kum 2020-ah a chhuak a ni. Thubuai hi 180 vel a nei mek.

Police-te'n an man hian tualchher pistol leh cartridge pahnih an man tel a, a motorcycle ruk pawh hmuh a ni bawk. Thu zawhfiah a nih hnuah pistol dang panga, cartridge panga leh a car ruk hmuh belh leh a ni.