Jaya-i thih dan chhui chiang dawn

Tamil Nadu Chief Minister Edappadi K Palaniswami chuan chief minister hlui J Jayalalithaa-i thih dan chhui chiangtu tur inquiry commission din a ni dawn tih a sawi.

CM chuan inquiry commision hi Madras High Court judge hluiiin a ho dawn tih a sawi a, Jaya-i in, Poes Garden ami pawh amah hriatrengna hmun atana siam a ni dawn tih a sawi bawk. Ningani-a Secretariat-a press meet a neihah CM hian hemi chungchang hi a sawichhuak a, Jaya-i thih dan chhui chiang tur hian pawl hrang hrang aṭanga ngenna a awm avangin sorkar chuan ngun taka a ngaihtuah hnuah inquiry commission din hi a rel ta a ni, a ti.

Palaniswami chuan chief minister hlui Jaya-i chuan a hnathawh ropui tak avangin an state tan thil ṭha tak tak a thlen niin a sawi. “Amma (Jaya-i) chu damlohna avangin damdawi-inah dah luh a ni a, theihtawpa enkawl a ni chungin December 5 khan a thi ta a ni. Hetih lai hian a damloh leh thih chungchangah hian media lamah report hrang hrang a awm a ni” tiin, hei vang hian a thih dan dik tak hi chhui chian a ngai nia a hriat thu a sawi.