Kohhran chanchinbuin NDA leh Nazi khaikhin

Goa-a Catholic kohhran chanchinbu-ah BJP kaihhruai National Democratic Alliance (NDA) sorkar leh Juda mi tam tak suattu, Germany-a Nazi-te chu khaikhin an ni.

Archdiocese of Goa and Daman chanchinbua article pakhat, FE Norohna ziahah chuan NDA leh Nazi Germany-te khaikhinin, kar lehah bypoll neih turah pawh chak lo ngei se a duh thu a ziak. Goa-ah hian mipui hmun lia ṭhena hmun khat aia tam hi Catholics kohhran mi leh sa an ni. August 23 hian Pananji bypoll an nei dawn a, he inthlan hi Chief Minister Manohar Parrikar pawhin a chuh dawn a ni.

Article-ah hian India ramah nitin ram danpui palzutna nasa tak hmuh a ni ṭhin tih a sawi a, eirukna leh inthliarna te chu thil ṭha lo a ni a, hei aia ṭhalo chu inlakbingna nasa tak leh thuneihna pumhlum neih tumna a ni, a ti. Goa mipuite chu an vote hmangin ramchhunga right-wing kal fawr lutuk dang turin a ngen a ni.

August 23-a bypoll neih tur chu mipuiten democracy dinhmun tlachhe tur siamṭhatna remchang atana hmang a, Parrikar-a vote lo turin a sawm. Zalenna, democracy leh sakhaw zalenna te chu eirukna aia ngaih pawimawh tur a ni, a ti. Manohar Parrikar hi kumin March thla khan Goa chief minister atan lakluh a ni. BJP hian Assembly seat 40-ah member 13 chauh nei chungin hun tepter takah ṭangrual sorkar an din thei a, mahse sorkar an siam dan kawngah thil dik tawk lo a awm nia ngaiin mi tam tak chuan BJP hi sorkarna chelhtu ni zel tlakah an ngai lo a ni.