Utkal Express chesualah mi 23 an thi

Uttar Pradesh-a rel chesualah mi 23 an thi a, mi 400 chuangin hliam an tuar.

Kar kalta Inrinni tlai dar 5.46 khan Puri-Haridwar inkara tlan, Utkal Express chu Muzaffarnagar bul, Khatauli-ah Khatauli station a tlan pelh hnu lawkah a kawng zawhsualin a chesual a, rel pindan 14 a let a ni.

National Disaster Response Force (NDRF) chuan chhanchhuah hna a thawk nghal a, hliam tuar zingah dinhmun ṭha lo tak tak an awm avangin thi zat pawh hi an la punchhoh rin a nih thu official-te’n an sawi.

Rel pindan let zinga pathum hi AC coach a ni a, a bak chu sleeper coach a ni. Pindan parukte chu a chhe hneh hle. Pindan pahnih let hian chenna leh college an su tel a ni. Khatauli Station Superintendent Rajinder Singh chuan chetsualna a thlen lai hian rel hi darkar kahta km 100-a chakin a tlan niin a sawi.

Railways Ministry chuan rel chesuala thi chhungte chu cheng nuai 3.5 ṭheuh pek an nih tur thu a sawi a, hliam tuar na zualte chu Rs 50,000 leh hliam na vak lo te chu Rs 25,000 ṭheuh pek an ni dawn tih a sawi. Odisha leh Uttar Pradesh sorkar pawhin thi chhungte leh hliam tuar te chu zangnadawmna pek an nih tur thu a sawi bawk.

Railways Minister Suresh Prabhu chuan chetsualna thlen chhan chhui chiang turin thupek a tichhuak nghal a ni.

Kum nga kalta chhung khan ramchhung­ah rel chetsualna ṭum 586 a thleng a, heng zinga 53% chu kawng zawhsual vang an ni. Kum 2014 November thla aṭang khan rel chesualna hi ṭum 20 a thleng tawh a, mahse a tam zawk chu a nasa lo a ni. Chetsualna nasa ber chu kum 2016, Novembre thlaa Kanpur bula kawng zawhsuala Indore-Patna Express chesual khan a ni a, he chetsualna thlengah hian mi 150 an tih a, mi dang 150 chuangin hliam an tuar bawk.

Utkal Express chetsualna thleng avang hian police-te chuan mi tu tih hriat loh lakah IPC seciton 304A (death due to negligence) hnuaiah FIR an ziaklut a ni. FIR ziahluah hian hnaa inthlahdah leh ngaithah avanga midangte natna leh thihna hial thlen phahna thubuai te a tel a ni.