Darjeeling-a bomb puak NIA chhuitir phut

Gorkha Janamukti Morcha hotu Bimal Guring chuan Union Home Minister Rajnath Singh hnenah lehkha thawnin, August 18-a Darjeeling khuaa bomb puak chungchang chu National Investigation Agency (NIA) chhuitir turin a nge.

West Bengal Police-te chuan bomb puak avang hian Unlawful Activities (Prevention) Act (UAPA) hnuaiah Gurang leh midang pahnihte chu thubuai an siamsak nghal a ni.

Rajnath Singh-a hnenah lehkha a thawnah, Gurung chuan August 18-a Darjeeling-a bomb puak chu tu tih puah nge tih leh, bomb tihpuah chhan pawh engmah hriatchian a nih hmain police-te chuan GJM president leh hruaitu dangte lakah FIR an ziaklut nghal niin a sawi. Hetiang thil liantham thleng a, thil awmdan chhui hna pawh ṭan a nih hmaa awlsam taka FIR an ziahlut nghal mai chu Gorkha mipuite chuan mak an tihle tih a sawi.

GJM hotu chuan bomb hi Darjeeling Sadar Police Station bul maia tihpuah a nih laia, police-te’n bomb kam tute an hmu lo leh hre lo chu mak a ti thu a sawi bawk. He thil thleng hi high-level inquiry committee-in chhui ngei se a duh thu a sawi a, Supreme Court judge enpuina hnuaiah NIA investigator-te chhui tir a duh tih a sawi a ni.

Kar kalta Zirtawpni zan khan Darjeeling-ah hian bomb a puak leh a, hliam leh thi awm lo mah se dawr tam tak a tichhia a ni. Bomb puahna hmun hi GJM office bul hnai, Singamari Motor Syndicate bula Old Super Market a ni.