Mi mtd 11 chuangin tuilian tuar
Ramchhung hmun tam takah ruahsur nasa avangin tui a lian a, tuilian tuartu hi mi maktaduai 11 chuang an tling. Meteorological department chuan ruah hi a la sur chhunzawm zel dawn niin a tarlang.
Uttar Pradesh-ah chuan district 24-a khaw 2,523-te’n tuilian hi an tuar a, tuilian avanga thi hi mi 69 an tling tawh. Tuilian vang hian mi nuai 20 chuangin harsatna an tawk mek a ni. State sorkar chuan harsatna tawkte tan hian hmun hrang hrangah relief camp a siam a, heng camp-ah hian mi 39,783 an khawsa mek a ni. Tuilian tuarte chhanchhuah leh chhawmdawl hna hi ngawrh taka thawh mek a ni.
Kar kalta Zirtawpni thleng khan Bihar-ah tuilian avanga thi mi 153 an tling tawh. District 17-te’n tuilian hi an tuar a,tuilenna hmun aṭangin mi 300 chhanchhuah an ni tawh bawk. Tuilian hian kawngpui leh lei te a chim chhiat avangin hmun eng emaw zat chu tlawhpawh theih lohin an awm a, heng mite chhawmdawl leh chhanchhuah hna hi lawng hmanga thawh a ni.
West Bengal-ah pawh tuilian avang hian mi 55 an thi tawh. Tuilian hian ziaawm lam a pan ṭan nia sawi a ni. State chhung hmarlam biala district parukten tuilian hi an tuar a, harsatna tawk hi mi nuai 52 an tling a ni. Ni hnih chhung chu ruah sur a ziaawm avangin tuilian pawhin kam lam a pan niin official-te chuan an sawi. Tuilenna bial hrang hrangah relief camp 776 siam a ni a, heng hmunah hian mi 2,08,513 an khawsa mek a ni. Camp hrang hrangah hian ei tur, tui thianghlim leh damdawite sem a nih thu official-te chuan an sawi. Hei bakah hian camp-ah hian hri a leng venthawn thilah an hriselna dinhmunte pawh uluk taka ensak reng an ni bawk.