AAP MP-in Delhi Lt Governor notice pawtthler

Delhi-a rorellai, Aam Aadmi Party (AAP) leh central-a rorellai, BJP inkar boruak a la chhe chho zel. Nimin khan AAP MP Sanjay Singh chuan Khadi scam-a inhnamhnawiha Delhi lieutenant governor VK Saxena a puh chungchanga defamation notice a pekna chu press meet a neihnaah a pawtthler.

Sanjay Singh chuan, "India ram Danpui chuan thu dik tak sawichhuak turin dikna chanvo min pe," tiin Rajya Sabha member a nih angin thu dik chauh a tarlan thu a sawi bawk. "Rukru, eiru bawkin hriattirna min pek avang hian ka tlawm dawn lo," tiin Lt. Governor-in defamation notice a pekna lehkha chu hmun eng emaw zatah a pawtthler a ni.

AAP chuan BJP sorkarin a ruat, Delhi Lieutenant Governor chu BJP leh prime minister Narendra Modi thupek angin, AAP laka politics phuba lak tuma cheah an puh.

Saxena hi Khadi and Village Industries Commission (KVIC)-a chairperson a nih lai, kum 2015-2022 kumtir lam thleng khan thil dik tawk lo tiah AAP chuan an puh. Kum 2016 khan KVIC hnathawkte chu pawisa note thi tawh, Rs vbc 1,400 chu a thleng luih tir a, hei bakah a thuneihna chu dik lo taka hmangin, Mumbai-a Khadi Lounge-a interior designing contract chu a fanu hnenah a pe niin an puh bawk.

Lt Governor Saxena hian AAP-in an puhna chu thu dik lo, tihhmingchhiat an tumna niin a sawi thung. Thawhṭanni khan AAP hruaitu Sanjay Singh leh Durgesh Pathak bakah Atishi, Saurabh Bhardwaj leh Jasmine Shah-te hnenah legal notice a pe a ni. A lehkha pekah hian AAP hruaitute chu press release siam a, an party member leh an kaihhnawih dang zawng zawng pawh thu dik lo leh midang tihhmingchhiat tumna lam thu thehdarh tawh lo tura hriattir turin a ti a ni. AAP MP Sanjay Singh chuan he a notice dawn hi a pawtthler a ni.