Congress Party-in 'Bharat Jodo Yatra' hawng

Congress party chuan Kanyakumari-Kashmir inkara Bharat Jodo Yatra an neih tur chu nimin khan party MP Rahul Gandhi-a'n a hawng. Tukin aṭang khan Kanyakumari aṭangin an kal chhuak ṭan.

Bharat Jodo Yatra-ah hian km 3,570-a thui an kal dawn a, ni 150 vel an thang ang.

Congress party chuan he yatra hi kum 2024 inthlanpui neih tur thlirin, mipui tam zawk nena inpawhna an neih theihna turin a ruahman a ni. Ram inpumkhatna lantirna atana buatsaih an ni tih party hruaitute chuan an sawi.

Km 3,570-a thui yatra neih tur hi kum 100 chuang chhunga India rama kawngzawh huaihawt tawha thui ber tur a nih thu sawiin, nimin tlai dar 5 khan rally hmangin hawn a ni, tukin zing aṭang khan ke-in an kal chhuak ṭan a ni.

Rahul Gandhi hoin party worker-te chu batch hnihin an kal dawn a, nitin zing dar 7 aṭanga tlai dar 6.30 thleng kalin, ni 150 chhungin state 12 leh Union Territory pahnih an kaltlang dawn ani. Gandhi hi yatra tawpna tur, Kashmir thleng a tel ang.

Gandhi leh yatra-a telte hi an kal chhung hian hotel-ah thleng loin, mawlmang takin an awm dawn a, container-ah an chawl mai ṭhin dawn a ni. Container-ah hian mutna tur khum leh toilet-te siamin, air-conditioner dah a ni bawk.

Yatra a hawn hma, nimin zing khan Rahul Gandhi chu kum 1991, May 21-a a pa, Rajiv Gandhi tihhlum a nihna hmun, Sriperumbudur-a Rajiv Gandhi Memorial a tlawh. A pa zahna pangpar dahin, "Politics-a inhuatna leh inṭhendarhna avangin ka pa ka chan a ni. Heng thil avang hian ka hmangaih, ka ram hi ka chan tawh lo ang. Hmangaihna hian huatna hi a hneh zel ṭhin. Beiseinain hlauhna a hneh bawk. Kan thawhho chuan kan hneh vek thei a ni," a ti.