AIADMK pawl pahnihte inzawmkhawm

Tamil Nadu-a rorellai, AIADMK hnuaia pawl pahnih, Chief Minister Edappadi K Palaniswami leh CM hlui O Panneerselvam kaihhruaite chu nimin khan an inzawmkhawm leh ta.

Hruaitu pahnihte hian nimin khan an inzawmkhawm leh tak thu hi Chennai-a party headquarters-ah an puang a ni.

Nikum December 5-a Chief Minister hlui leh AIADMK hotu lu ber, J Jayalalithaa-i a thih hnu khan party chhungah hruaitu dinhmun inchuhna awm avangin innghirnghona a chhuak zui a ni. Jaya-i aiawh tura an ruat, MK Sasikala-i lamṭang leh Jaya-i’n Chief Minister tura a ruat O Panneerselvam-a lamṭang pawlah an phel zui a ni.

MK Sasikala-i chu Tamil Nadu chief minister atana lakluh a nih hmain, eiruk thubuaiah thiam loh chantir a nih avangin man a ni a, Bengaluru jail-ah a tang zui a ni. Hei vang hian amah thlawptu, Edappadi K Palaniswami chu chief minister atan lakluh a ni ta zawk a, Sasikala-i lamṭang AIADMK pawl pawh hi a ho zui a ni.

Hun eng emaw chen an inṭhendarh hnuah pawl hnihte inzawmkhawm dan tur ngaihtuahin an inbia a, Palaniswami hian Panneerselvam lamṭangte thil phut tihhlawhtlin an remtih hnuah inzawmkhawm dan tur hian buaipui zui a ni. Chief Minister hian Jaya-i thih dan chhui chiang tur tur inquiry commission a din tawh a, hei bakah hian Jaya-i in Poes Garden chu amah hriatrengna hmuna siam a ni tur thu a puang tawh bawk. Hetih lai hian Panneerselvam-a thil phut dang, party aṭanga Sasikala-i leh a chhungte hnawhchhuah chungchangah erawh chuan thutawp siam a la ni lo.