Karnataka BJP-in CM bang turin phut

Karnataka-a BJP hruaitute chuan Chief Minister Siddaramaiah chu dik lo taka Anti-Corruption Bureau (ACB) hmang ṭangkaiah puhin CM a nihna aṭanga bang turin an phut.

Eptute chuan CM hian eptu hruaitute laka dik lo taka thubuai siamsak turin a tilui niin an puh a, thubuai siamsak zingah hian BJP state unite hotu BS Yeddyurappa pawh a tel a ni.

CM bang tura phut zingah hian deputy chief minister hlui R Ashok leh MP Shobha Karandlaje pawh an tel a ni.

Karandlaje chuan state sorkarin ACB a din chuan Lokayukta a tihchak loh phah niin a sawi a, ACB chu mahnia thu neia siam a ni lo a, chief minister-in a thunun tlat a, CM hian eptu hruaitute beihna atan leh, an laka thubuai siamsakna atan a hmang a ni, a ti.

ACB hian Yeddyurappa chu chief minister a nih lai, May 2008 - July 2011 inkar khan Dr K Shivaram Karanth Layout tana ram acre 3,546 pek tura hriattirna tihchhuah chu committee pawmpui loh­in a lo hnawlsak nia sawi a ni a, hei vang hian a lakah FIR ziahluh a ni. Mahse Karandlaje chuan Yeddyurappa laka FIR ziahluh hi Income Tax department-in minister DK Shivakumar-a in an dap sak avanga phuba an lakna hmanrua mai niin a sawi thung.