SC-in thla ruk atan triple talaq hman khap

Supreme Court chuan Muslim-te inṭhenna dan chi khat, triple talaq chu thla ruk chhung atan hman a khap. He khapna hi hmang ṭan nghal turin a tibawk.

Triple talaq chungchang hi Supreme Court judge panga awmna bench chuan ngaihtuahin, he dan hi ram danpui kalh leh dan mumal lo niin an sawi. Judge-te hi Chief Justice Jagdish Singh Khehar, Justice Kurian Joseph, Justice Rohinton Fali Nariman, Justice Uday Umesh Lalit leh Justice S Abdul Nazeer-te niin, sakhaw hrang hrang - Sikh, Christian, Parsi, Hindu leh Muslim an ni. Anni hian triple talaq chungchanga petition thehluh hrang hrang an ngaihtuah a, petition thehluttu zingah hian Muslim hmeichhe pawl pawh an tel a ni.

Supreme Court advocate Monika Arora chuan triple talaq chu intluktlanna le hmei­chhiate zahawmna palzutna a ni, a ti. Triple talaq chungchang ngaihtuahnaah hian Supreme Court chuan he dan hman hi Muslim nupa inṭhenna ṭha lo leh duhawm lo ber a ni thu a sawi. Hemi rual hian sorkar laipui chuan bench-in Muslim-te inṭhen nghal theihna dan triple talaq hman a khap avangin inṭhenna dan thar a siam nghal tih a sawi bawk. Muslim-te inṭhenna dan pangngai chi thum - talaq-e-biddat, talaq hasan and talaq ahsan chu rorelnain a huam phak loh chin niin sorkar chuan a sawi.

Triple talaq hi India rama Muslim-te’n inṭhenna dan an hman chi khat a ni. He dan hnuaiah hian mipa chuan talaq (inṭhen) tih thu hi vawi thum a zawna a sawi emaw a ziak a nih chuan a nupui chu a ṭhen nghal thei a ni. Tunlai hunah chuan sms, email leh social media pawh an hmang thei tawh a ni. Mipa chuan talaq tih sawia a nupui a ṭhen hian a ṭhen chhan a sawilan kher a ngai lo a, he thu a sawi lai hian a nupui a awm ve kher pawh a ngai lo bawk. He dan hian sawisel a tawk nasa hle a, Muslim hmeichhia tam takin an dodal a ni.