AIADMK merger : Deputy CM atan Pannerserlvam lalut

Tamil Nadu-a rorellai, AIADMK-a pawl pahnih, Chief Miniter K Palaniswami leh CM hlui O Panneerselvam lamṭangte chu an in­chhunfin ta a, an inchhunfin hnu hian Panneerselvam chu deputy chief minister atan lakluh zui nghal a ni.

Nikum December thla khan CM hlui leh AIADMK hotu lu ber, J Jayalalithaa-i a thi a, a thih hnu hian party chhungah buaina hi a awm zui ta a ni. Jaya-i thlaka party hotu atana ruat, VK Sasikala-i leh Jaya-in chief minister atana a dah O Panneerselvam-te inkarah inhriatthiam lohna awmin, AIADMK hi an phel zui a ni. Sasikala-i hi chief minister atana lakluh tum a nih laiin a sum lakluh phu loa hausaa puhna thubuaiah thiam loh chantir a nih avangin man a ni a, Bengaluru jail-ah tantir a ni. Jail-a a luh hma hian a vahpa, TTV Dinakaran chu party deputy general secretary atan a ruat a, amah thlawptu Edappadi Palaniswami chu chief minister atan a dah zui bawk.

Sasikala-i jail-a a tan hlan hian Palanisami leh Panneerselvam-te chuan AIADMK pawl pahnihte in­chhunfin dan tur ngaihtuahin inbiakna an nei a, Thawhṭanni khan Chennai-a an party headquarters-ah pawl hnihte inchhunfinna tur hi an tifel ta a ni. He hunah hian party worker tam tham tak an pungkhawm a ni.

Pawl pahnihten inchhunfinna tura inbiakna an neihah hian Panneerselvam-a pawlte hian thil phut hrang hrang an nei a, an thil phut zingah hian party aṭanga Sasikala-i leh a chhungte hnawhchhuah pawh a tel. Sasikala-i vahpa, Dinakaran-a pawh deputy secretary a nihna aṭangin ban a ni tawh bawk.

Hetih lai hian Dinarakan-a thlawptu, MLA 18-te chu Thawhṭanni zan khan Jaya-i thlanah kalin minute 15 hun an hmang a, pawl pa­hnih inzawmkhawm chu an thlawp loh thu an sawi. Dinakaran hian governor C Vidyasagar Rao hmuin, AIADMK pawl hnih inzawmkhawm­te sorkar siam chu an thlawp loh thu hrilh a tum bawk. Dinakaran-a ṭan­tu lam hian sorkar an thlawpna hi an hnuhdawh chuan state sorkar dinhmun tur hi a chiang dawn lo a ni.

Prime Minister Narendra Modi chuan AIADMK pawl hnihte an inchhunfin thei ta chu a lawmpui thu sawiin, Tamil Nadu state pawhin hmasawnna kawng thar a zawh a duhsak thu a sawi. Tamil Nadu assembly-ah hian member 233 awmin, Jaya-i thihsan seat erawh a la ruak rih a, AIADMK hian MLA 134 a nei mek a ni. Dinakaran leh a lamṭangten sorkar an thlawpna an hnuhdawh chuan MLA 116 chauh a nei dawn a, sorkarna siam tura MLA neih ngai zat 117 an nei pha dawn lo a ni. Hetih lai hian Dinakaran chuan thlawptu MLA 20 a nei niin a insawi a, mahse jail-ah tang mek a ni. Sasikala-i party aṭanga hnawhchhuah a nih chuan sorkar pawh a tla nghal ang tiin a vau.