UP-ah rel a chesual, mi 80-in hliam tuar ; Railway Minister-in ban a tum

Uttar Pradesh-a Auraiya district-ah nimin zing khan Delhi pana tlan, Kaifiyat Express chu kawng zawhsualin a chesual a, pindan 10 a let. Rel chesualah hian mi 80-in hliam an tuar a ni.

Rel chesuala hliam tuarte hi damdawi-in panpui nghal an ni a, an zinga mi palite dinhmun chu a ṭha lo hle nia sawi a ni.

Railways Minister Suresh Prabhu chuan rel chetsualna hmun pan tur hian senior officer-te hriattir an nih thu a sawi. Chhanchhuah hna thawk turin National Disaster Response Force pawh tirh an ni bawk.

Uttar Pradesh-ah hian ni nga liamtaah khan Utkal Express chu Khatauli-ah a lo chesual tawh bawk a, pindan 14 letin mi 23 an thi a ni.

Ni nga chhung leka Uttar Pradesh-a rel chetsualna ṭum hnih thleng avang hian pawi a tih thu leh hrehawm a tih thu sawiin, Railway Minister Suresh Prabhu chuan mawhphurhna laa minister a nihna aṭanga ban a duh thu a sawi a, mahse Prime Minister Narendra Modi chuan bang rih lo turin a ngen.

Minister Prabhu chuan hemi chungchang hi a twitter-ah tarlangin, PM Modi hmuin ban a duh thu a hrilh tih a sawi. Prabhu chuan kum thum chhung minister dinhmun a chelh chhungin, Railways lam hmasawnna leh ṭhatna turin a theihtawp a chhuah a, Railways pawhin hma sawn lam a pan mek tih a sawi bawk.

Ni reilote chhunga ṭum hnih rel chetsualna thleng avang hian Railway Board chairman AK Mital pawhin mawhphurhna lain banna a thehlut bawk. Mital hi July thla khan chairman a nihna hi kum hnih atan pawhsei sak a ni a, hei hi Prime Minister Office pawhin a pawmsak tawh a ni. A banna thehluh hi pawmsak a ni nge ni lo sawichian a la ni lo.