Bihar CM leh Dy CM bang turin phut

Bihar-a eptu pawl, Rashtriya Janata Dal (RJD) chuan Chief Minister Nitish Kumar leh Deputy Chief Minister Sushil Modi-te chu dik lo taka sorkar sum transfer naa inhnamnawihah puhin bang turin an phut.

Nimina Bihar Assembly rorel inkhawmah pawh RJD MLA-te’n CM leh Dy CM bang tura phuta inkhawm an auhbuai avangin inkhawm pawh tihtawp a ngaih phah a ni.

RJD member-te chu an party hruaitu leh deputy chief minister hlui, Tejashwi Prasad Yadav-a hoin house aṭangin an chhuak tau a, assembly campus chhunga socialist leader Karpoori Thakur-a lim bul­ah lungawi lohna an lantir chhunzawm nghal a ni.

Yadavb chuan Srijan government fund transfer chungchanga thil dik lo tak tih chu sorkar chuan thup tumin, thil awmdan kimchang pawh a puangzar duh lo niin a sawi. He fund dawngtute an hriat duh thu an sawi a, mahse sorkar chu a ngawi tlat a, BJP hruaitu leh Deputy CM Modi-a leh a chhungte chu an inhnamhnawih avangin thupbo an tum a ni, a ti.

August 3 khan sorkar­in cheng vaibelchhe 10 lakchhuana tur cheque a pek chu bank-in fund-ah hetiang zat sum a awm tawh lo tia sawi a, a thawnkir avangin Srijan fund buaina hi hriat­chhuah a ni ta a ni. Heta ṭang hian sorkar fund tam tham tak chu NGO - Srijan Mahila Sahyog Samiti tan dik lo takin transfer a nih thu hriatchhuah a ni a, district magistrate signature lem hman nia sawi a ni bawk.

Sorkar fund khawih chingpen a nih dan hi state sorkawr chuan Bihar police special investigating team a chhuitir mek a, Central Bureau of Investigation (CBI) chhui tir tum a ni bawk.